bata.en kya tujh ko chashm-e-pur-nam hua hai kya ḳhuun aarzu ka
bana gul-e-dagh-e-yas-o-hasrat jo dil men qatra bacha lahu ka
dabe jo ghuT ghuT ke dil men arman vo barq ban kar falak pe taḌpe
jo valvala ji men rah gaya tha vo bulbula ab hai ab-e-ju ka
abas hai to chara-gar-e-pareshan na tujh se kuchh ban paḌega darman
ki ho to tar-e-nafas se saman jarahat-e-dil ke ho rafu ka
khula lab-e-gor se ye uqda ki ḳhvab thi sab numud-e-hasti
vuquf na-mahrumi-e-manzil kamal hai meri justuju ka
na tujh ko mast-e-hava-e-gulshan ḳhizan men ai andalib dekha
nahin tu shaida.i bagh-o-gul ka magar fida.i hai rang-o-bu ka
use na phir kuchh diya dikha.i nazar paḌa vo jamal jis ko
khula haqiqat ka raaz jis par na us ko yaara tha guftugu ka
hai naf-e-zat aur nasḳh-e-hasti visal-e-janan ki shart-e-avval
bhara manazir se hai jahan sab jo sirf darshan ka tu hai bhuka
tilism-e-dair-o-haram hai tujh par hanuz dilli hai duur nadan
vahan tira ḳhaak dil lagega vo hai sarasar makan hu ka
ḳhabar kise sub.h-o-sham ki hai ta.a.inat aur quyud kaise
namaz kis ki vahan kisi ko ḳhayal tak bhi nahin vuzu ka
nahin muhit-e-rusum-o-millat hai be-nishan manzil-e-haqiqat
vahan na simran ki hatkaḌi hai na tauq-e-zunnar hai gulu ka
hain gharq-e-bahr-e-mai-e-mohabbat vahan hai ‘kaifi’ ye sab ki halat
hai daḳhl saaqi ki bazm men kya surahi-o-saghar-o-subu ka
Leave a Reply