Dikhate Hain Jo Ye Sanam Dekhte Hain

dikhate hain jo ye sanam dekhte hain

khuda ki khudai ko ham dekhte hain

ye haivan hai dast-e-talea pe bhari

nae janvar ka qadam dekhte hain

zan-o-khvesh-o-farzand-o-daulat se chhute

na dekhe koi jo ki ham dekhte hain

shahanshah ham hain dilon par hain hakim

gada tum ko ai zi-hasham dekhte hain

faqat haath kaale nahin balki munim

dilon par bhi dagh-e-varam dekhte hain

kahan tak utarti hai siine pe mere

tiri tegh-e-abru ka dam dekhte hain

bhagati hai mar-e-siyah go ki ham ko

tiri zulf-e-mushkin ka sam dekhte hain

zamin par bhi deta nahin chain ham ko

falak tujh se jaur-o-sitam dekhte hain

dur-e-ashk se mera bharti hai daman

sakhi tujh ko ai chashm-e-nam dekhte hain

na ranj aur na shadi tavassut hai ham ko

ki aish-o-alam bhi baham dekhte hain

kisi maah ne us ko dhoka diya hai

ham ‘akhtar’ ko kyuun pur-alam dekhte hain

Leave a Comment