Poet
sitare palkon pe jalva-gar the shikast-e-azm-e-fughan se pahle
gham-e-nihan se zamana vaqif tha sharh-e-soz-e-nihan se pahle
hamari hi sa.i-e-justaju ne suragh-e-manzil diya jahan ko
talash-e-manzil men ham ravana hue the har karvan se pahle
pasand aaya na bijliyon ko koi jo kartin tavaf un ka
mile ka.i aur bhi nasheman unhen mire ashiyan se pahle
sitam-rasidon ki anjuman men chhiḌe hain jab zalimon ke charche
tumhara naam aa gaya hai aksar zaban par asman se pahle
unhen ye zid hai sunenge meri zaban se mera fasana-e-gham
main sochta huun fasana-e-gham suna.un bhi to kahan se pahle
tumhari ḳhalvat-kade ke parde uThe hue hain durust lekin
chhuḌa to luun daman-e-nazar ko tahayyur-e-be-karan se pahle
gharaz ke bande hain ahl-e-alam nahin koi ba-vafa jahan men
na kijiye faisla abhi ye ‘nasir’ ke imtihan se pahle
Leave a Reply