Nae Manzar Sarabon Ke Meri Aankhon Mein Bhar Dena

Manish Shukla

na.e manzar sarabon ke miri ankhon men bhar dena

agar manzil nazar aa.e mujhe gumrah kar dena

mujhe ye kashmakash ye shor-o-ghul sairab karte hain

miri kashti ko dariya aur dariya ko bhanvar dena

miri avargi hi mere hone ki alamat hai

mujhe phir is safar ke ba.ad bhi koi safar dena

miri parvaz ki hasrat yaqinan zor maregi

agar uḌne lagun to mire bal-o-par katar dena

suna hai dasht men aage bahut tarik hai rasta

mire raḳht-e-safar men chand ya ḳhurshid dhar dena

bujha dena zara pahle diya meri sama.at ka

kabhi meri riha.i ki mujhe jab tum ḳhabar dena

juda karna mire is ḳhvab se tum daf.atan mujh ko

juda.i ki mujhe ghaḌiyan ḳhudaya muḳhtasar dena