pahli baar vo ḳhat likkha tha
jis ka javab bhi aa sakta tha
ḳhud afvah uḌata tha main
ḳhud hi yaqin bhi kar leta tha
us se kaho us ruup men aa.e
jaisa pahli nazar men laga tha
bhuul chuka tha de ke sada main
tab jangal ka javab aaya tha
ham to para.e the is ghar men
ham se kaun ḳhafa hota tha
TuuT ga.e is koshish men ham
apni taraf jhukna chaha tha
ulajh rahi thi aankh kahin par
koi mujhe pahchan raha tha
TuuT gaya phir gham ka nasha bhi
dukh kitna sukh de sakta tha
jagah jagah se TuuT raha huun
kis ne mujhe chhu kar dekha tha
kitne sachche dil se ham ne
apna apna jhuuT kaha tha
pahli baar main us ki ḳhatir
apne liye kuchh soch raha tha
itne samjhane vaale the
main kuchh kaise samajh sakta tha
baḌi baḌi ankhon men us ki
koi saval hua karta tha
Leave a Reply