Abdurrahman Momin
tu agar mera tazkira karega
jhuut bolega aur kya karega
khud ko tu janta nahin shayad
tu samajhta hai sab khuda karega
zakhm kha kar bhi jo duaen de
kaun us ka muqabla karega
kya use yaad bhi na aunga
kya mujhe yaad vo kiya karega
phir kahan mil sakega vo mujh se
jo mujhe aap se juda karega
apni jhuti ana ki khatir to
jaane kis kis se rabta karega
dil hi aisa hai ba-vafa ‘momin’
bevafa se bhi jo vafa karega
Leave a Reply