barham kabhi qasid se vo mahbub na hota
gar naam hamara sar-e-maktub na hota
khuban-e-jahan ki hai tire husn se khubi
tu khuub na hota to koi khuub na hota
islam se bargashta na hote ba-khuda ham
gar ishq-e-butan taba ke marghub na hota
kyuun pher vo deta mujhe le kar mire bar se
itna jo dil-e-zar ye maayub na hota
is but ko khuda laaya hai ham paas vagarna
jiine ka hamare koi uslub na hota
dil aaj ke din paas jo hota mire to aah!
aane se main us shokh ke mahjub na hota
hain lazim-o-malzum baham husn o mohabbat
ham hote na talib jo vo matlub na hota
sar apna rah-e-ishq men deta jo na ‘jurat’
tu majma-e-ushshaq ka sarkub na hota
Leave a Reply