aage tum ho to jafaon ka qalaq yaad nahin
dil vo bachcha hai jise pahla sabaq yaad nahin
kya bata.en ki thi kya sub.h-e-azal vo surat
is kaḌi dhuup men aariz ki shafaq yaad nahin
jaane kis gaam khulen us ke tabassum ke rumuz
aa chuke kitne hi nairang ufaq yaad nahin
umr-e-rafta men tira naam bhi likkha tha kahin
le gaya kaun uḌa kar vo varaq yaad nahin
jabr-e-duniya men vo collage ka zamana bhula
the kitabon men likhe kaun se haq yaad nahin
jang se mas.ale hal karne chale ho logo
tumhen tariḳh ka ek ek sabaq yaad nahin
Leave a Reply