akhtar-azad-1

Haal-e-dil Sunane Mein Umr Bit Jati Hai

hal-e-dil sunane men umr biit jaati hai

dil men ghar banane men umr biit jaati hai

yuun to roz kahte hain un ko bhuul jaenge

haan magar bhulane men umr biit jaati hai

yuun to muskurane ko roz muskurate hain

khul ke muskurane men umr biit jaati hai

zindagi hamesha jab tirgi ki zad men ho

sham.a ik jalane men umr biit jaati hai

shauq-e-justuju men ham la-makan se guzre hain

ḳhud ko azmane men umr biit jaati hai

is liye nahin karte un se koi va.ada ham

va.ade ke nibhane men umr biit jaati hai

maut zindagi men kuchh fasla nahin lekin

phir bhi aane jaane men umr biit jaati hai

tinka tinka joḌa hai ham ne rat-din ‘aḳhtar’

ashiyan sajane men umr biit jaati hai

More Poems

Leave a Comment