Naseer Turabi
rache-base hue lamhon se jab hisab hua
ga.e dinon ki ruton ka ziyan savab hua
guzar gaya to pas-e-mauj be-kanari thi
Thahar gaya to vo dariya mujhe sarab hua
supurdagi ke taqaze kahan kahan se paḌhun
hunar ke baab men paikar tira kitab hua
har aarzu miri ankhon ki raushni Thahri
charagh soch men gum hain ye kya azaab hua
kuchh ajnabi se lage ashna dariche bhi
kiran kiran jo ujalon ka ehtisab hua
vo yaḳh-mizaj raha faslon ke rishton se
magar gale se lagaya to aab aab hua
vo peḌ jis ke tale ruuh gungunati thi
usi ki chhanv se ab mujh ko ijtinab hua
in andhiyon men kise mohlat-e-qayam yahan
ki ek ḳhema-e-jan tha so be-tanab hua
salib-e-sang ho ya pairahan ke rang ‘nasir’
hamare naam se kya kya na intisab hua
Leave a Reply