sauda-e-ishq ke to khata-var ham nahin
hain ishq ke mariz gunahgar ham nahin
ham jo khatak rahe the tumhari nigah men
lo ab tumhari raah men divar ham nahin
us ki khushi ke vaste khud ko fana kiya
phir bhi vo kah raha hai vafadar ham nahin
dil men hamare ek talatum sa hai bapa
khamosh hain ki zinat-e-akhbar ham nahin
tanhaiyon ki ham ne hi duniya basai hai
goshe men khud ke hain sar-e-bazar ham nahin
sahra ke gard-o-garm hi ab raas aa gae
‘sima’ kisi chaman ke ravadar ham nahin
Leave a Reply