tujh se mansub rahun teri kahi ja.un piya
tiri nisbat se likhi aur paḌhi ja.un piya
jhumti phirti havaon ki tarah se main bhi
chuum kar lams tira mast hui ja.un piya
tire ehsas se lipTi rahun ḳhushbu ki tarah
raat ki raani banun aur khuli ja.un piya
tiri aahaT ka sama.at men koi dar jo khule
main usi dar men diya ban ke jali ja.un piya
Daal duun ab-e-sitamgar men kahin kachcha ghaḌa
dar-e-kisra men kahin zinda chuni ja.un piya
raat ke pichhle pahar vajd ke aalam men kahin
main tiri ruuh men tahlil hui ja.un piya
phir tire ishq men ḳhushbu ka badan pahne hue
tiri chaukhaT pe agar ban ke jali ja.un piya
jab kahin koi faqiron men kare zikr mira
main tire dar ke faqiron men gini ja.un piya
mire hujre men tiri chaap ke jab phuul khilen
aap hi aap charaghon men Dhali ja.un piya
ho agar dafn mire saath tira naqsh-e-qadam
raqs karti su-e-maqtal ba-ḳhushi ja.un piya
ban ke dargahon pe main hijr ke maron ki dua
dard ke champa.i dhagon men bandhi ja.un piya
jab tire naqsh-e-qadam par main jhuki ja.un piya
asmanon men uḌuun uḌti chali ja.un piya
dekh le is men sarasar tiri badnami hai
ki tire dar se uThun aur tahi ja.un piya
Leave a Reply