ahmad-hamesh

Aakhiri Mukalima

le jaao darakhton ko le jaao

mere kis kaam ke ye darakht

le jaao

main to mar raha huun

mere saath jaane vaale

kuchh hi log to hain

main ne baat ki in raston se

ki jo raste nahin the

phir main nadi men Duub gaya

mujhe nahin maalum tha ki mujhe is tarah

aari se kaat diya jaega

ki darakhton men bhi

mera shumar nahin hoga

main niind ke akhiri hisse men khada huun

ek mazdur

belche se meri tasvir bana raha hai

raat guzar rahi hai

ki us ke guzarne se pahle bhi

ek raat guzar chuki hai

main bhala kis raat ka hisab duun

mujhe marne valon men

mera lahu bhi shamil hoga

ye mujhe maalum nahin tha

main mar raha huun

ki mujhe marne vaali zaat

meri riidh ki haDDi se

kalam kar chuki hai

us ne mujhe batan tankne vaali maamuli sui se chhed ke

jankani se guzar diya hai

magar us se pahle

mujh se ye bhi nahin puchha

ki main kisi jahan men

zinda tha bhi ya nahin

qadim kansi ke bartanon

mere naam par bahae hue

ansuon ka ek khazana to mahfuz hai

aur is khazane hi par to main ne israr kiya

kyunki main janta huun

ki ye duniya

keval ek chinta ghar hai

is men hazaron saal se rahne vaale ko bhi

rahne ke liye

ek pal bhi mayassar nahin

kyunki ik ik pal ka

daam chukana padta hai

pahad ek zarre ke hathon

bik jaata hai

main mar raha huun

magar is se pahle

main ne ek iltija ki hai

ki mujhe ik ik pal ka

daam chuka ke marne diya jaae

mere naam ke

an-ginat naam darj hain

thiik hai

mere vo tamam alfaz hi to

akarat gae na

jo mahz ek jhuut ke naam

likhe gae

magar ab kuchh janne ke liye

rah kya gaya hai

ki agar mera sach itna bada tha

tu use chhota karne ke liye

syahi se bhari davat

qalam-dan se pare

kyuun ulat di gai

main mar raha huun

magar mujhe ik ik pal ka

daam chuka ke marne diya jaae

aur ek darakht bhi

bach gaya hai

to le jaao ise le jaao

More Poems

Leave a Comment