Shahryar
nazar jo koi bhi tujh sa hasin nahin aata
kisi ko kya mujhe ḳhud bhi yaqin nahin aata
tira ḳhayal bhi teri tarah sitamgar hai
jahan pe chahiye aana vahin nahin aata
jo hone vaala hai ab us ki fikr kya kiije
jo ho chuka hai usi par yaqin nahin aata
ye mera dil hai ki manzar ujaaḌ basti ka
khule hue hain sabhi dar makin nahin aata
bichhaḌna hai to bichhaḌ ja isi do-rahe par
ki moḌ aage safar men kahin nahin aata
Leave a Reply