Imran Badayuni
logon ke sabhi falsafe jhuTla to ga.e ham
dil jaise bhi samjha chalo samjha to ga.e ham
mayus bhala kyuun hain ye duniya ke manazir
ab ankhon men bina.i liye aa to ga.e ham
kis baat pe ruThe dar-o-divar-e-makan hain
kuchh der se aa.e hain magar aa to ga.e ham
ḳhud raakh hue sub.h talak sach hai ye lekin
ai raat tire jism ko pighla to ga.e ham
ro.e hanse ujḌe base bichhḌe bhi mile bhi
dil saare tamashe tujhe dikhla to ga.e ham
kyuun hashiye par aaj bhi rakhti hai kahani
kirdar nibhane ka hunar pa to ga.e ham
ab baḌh ke zara DhunDh len manzil ke nishan bhi
ukta.e hue raste bahla to ga.e ham
sabun ki tarah ḳhud ko galana paḌa be-shak
par lafz-e-mohabbat tujhe chamka to ga.e ham
Leave a Reply