Parnav Mishra Tejas
ujḌe hue dimagh ka chehra udaas hai
sahra ke har suragh ka chehra udaas hai
cigarette ki is zara si hui raushni men dekh
so.e hue charagh ka chehra udaas hai
mahbub aur jahan ke zaḳhmon men jang hai
is saneha se daagh ka chehra udaas hai
aisa koi to tha jise phulon se pyaar tha
jo mar gaya to baagh ka chehra udaas hai
apni tarah se sab ne use kya na kuchh kaha
‘tejas’ tere ayagh ka chehra udaas hai
Leave a Reply