Murtaza Barlas
ik barg-e-sabz shaḳh se kar ke juda bhi dekh
main phir bhi ji raha huun mira hausla bhi dekh
zarre ki shakl men mujhe simTa hua na jaan
sahra ke ruup men mujhe phaila hua bhi dekh
tu ne to musht-e-ḳhak samajh kar uḌa diya
ab mujh ko apni raah men bikhra hua bhi dekh
maana ki tera mujh se koi vasta nahin
milne ke ba.ad mujh se zara aa.ina bhi dekh
tere liye to sirf isharon ka khel tha
mujh ko jo pesh aaya hai vo hadsa bhi dekh
auron ke paas ja ke miri dastan na puchh
jo kuchh hai mere chehre pe likkha hua bhi dekh
hamvar raston pe mira saath chhoḌ kar
aage nikal gaya tha to ab rasta bhi dekh
chehre ki chandni pe na itna bhi maan kar
vaqt-e-sahar to rang kabhi chand ka bhi dekh
Leave a Reply