Jab Yar Ne Utha Kar Zulfon Ke Baal Bandhe

jab yaar ne utha kar zulfon ke baal bandhe

tab main ne apne dil men lakhon khayal bandhe

do din men ham to rijhe ai vaae haal un ka

guzre hain jin ke dil ko yaan mah-o-sal bandhe

tar-e-nigah men us ke kyunkar phanse na ye dil

ankhon ne jis ke lakhon vahshi ghazal bandhe

jo kuchh hai rang us ka so hai nazar men apni

go jaama zard pahne ya chira laal bandhe

tere hi samne kuchh bahke hai mera naala

varna nishane ham ne maare hain baal bandhe

bose ki to hai khvahish par kahiye kyunki us se

jis ka mizaj lab par harf-e-saval bandhe

maroge kis ko ji se kis par kamar kasi hai

phirte ho kyuun pyare talvar dhaal bandhe

do-char sher aage us ke padhe to bola

mazmun ye tu ne apne kya hasb-e-hal bandhe

‘sauda’ jo un ne bandha zulfon men dil saza hai

sheron men us ke tu ne kyuun khatt-o-khal bandhe