Puchh Na Humse Kaise Tujh Tak Naqd-E-Dil-O-Jaan Lae Hum

Zubair Rizvi

puchh na ham se kaise tujh tak naqd-e-dil-o-jan laa.e ham

kin rahon se bach kar nikle kis kis se katra.e ham

raat akela pa kar ḳhud ko maiḳhane le aa.e ham

pi kar jhume jhuum ke nache der talak lahra.e ham

duniya valon ne jiine ki sharhen kaThin laga.i thiin

ḳhushbu ban kar phail ga.e ham badal ban kar chha.e ham

kaise kaise rishte joḌe ajnabiyon ne bhi ham se

sagar tah se do ik moti jab se chun kar laa.e ham

shahr-e-dil men raat koi sauda-gar ban kar aaya tha

naqd-e-dil-o-jan saunp ke us ko sub.h bahut pachhta.e ham

tashbihon ke rang-mahal men koi na tujh ko jaan saka

giit suna kar ghazlen kah kar divane kahla.e ham

chanda jaisa ruup tha apna phulon jaisi rangat thi

tere gham ki dhuup men jal kar kumla.e murjha.e ham