Lamha-Dar-Lamha Guzarta Hi Chala Jata Hai

Tanveer Ahmad Alvi

lamha-dar-lamha guzarta hi chala jaata hai

vaqt ḳhushbu hai bikharta hi chala jaata hai

abginon ka shajar hai ki ye ehsas-e-vajud

jab bikharta hai bikharta hi chala jaata hai

dil ka ye shahr-e-sada aur ye hasin sannaTa

vadi-e-jan men utarta hi chala jaata hai

ab ye ashkon ke muraqqe hain ki samajhte hain nahin

naqsh patthar pe sanvarta hi chala jaata hai

ḳhuun ka rang hai us pe bhi shafaq ki surat

ḳhak-dar-ḳhak nikharta hi chala jaata hai

vapsi ka ye safar kab se hua tha aghaz

naqsh-e-pa jis ka ubharta hi chala jaata hai

jaise ‘tanvir’ ke honTon pe likhi hai tariḳh

zikr karta hai to karta hi chala jaata hai