Pritpal Singh Betab
sar jaziron ke phir se ubharne lage
vo jo paani chaḌhe the utarne lage
ab kisi dost se koi shikva nahin
vaqt ke saath sab zaḳhm bharne lage
ham ne maazi men Thukra.i hain manzilen
raste men kahan ham Thaharne lage
mauj-dar-mauj ḳhushki thi pesh-e-nazar
shor andar ke dariya bhi karne lage
aise kya jurm sarzad hue arz par
log apne hi saa.e se Darne lage
aaj phir aap laghar hain suraj miyan
dhuup men log phir se ThiThurne lage
kaun se mansabon ki mohabbat men ham
apne mansab se niche utarne lage
tum ne sahra men chhoḌe the jo naqsh-e-pa
aaj vo andhiyon men bikharne lage
Leave a Reply