Ek Qafila Hai Bin Tere Ham-Rah Safar Mein

ik qafila hai bin tire ham-rah safar men

ashk aankh men hai dil men hai daagh aah jigar men

aram mujhe bin tire ik pal nahin ghar men

juun mardumak-e-dida huun din raat safar men

phirta hai vo gul-posh mire dida-e-tar men

hai shoala-e-javvala ki tasvir bhanvar men

surakh yahan surat-e-favvara hain sar men

dikhlaun tamasha jo mujhe chhod de ghar men

rashk aae na kyuun mujh ko ki tu dekh zar-o-sim

rakhta hai qadam palla-e-khurshid-o-qamar men

main in dur-e-shahvar ke ashkon se idhar aa

taulunga bitha kar tujhe hairan nazar men

aa dekh na hans hans ke rula mujh ko sitamgar

ik nuuh ka tufan hai mire dida-e-tar men

aks-e-lab-e-pan-khurda se dandan hain tire surkh

ya atish-e-yaqut hai ye ab-e-guhar men

baaz aao shikar-afgani se haath uthao

bhale ko miyan kis liye rakhte ho kamar men

rahti hai baham zulf bana gosh se tere

kuchh farq nahin hai sar-e-mu sham-o-sahar men

hai is men raqam hal-e-siyah-bakhti-e-ashiq

ye naama koi bandh do ab zaagh ke par men

ye bhi koi insaf hai ai khana-kharab aah

auron ko to le jaae hai tu din diye ghar men

aur ham jo hain so dekhne ko bhi tire tarsen

divar men rakhna hai na surakh hai dar men

kis vajh ‘nasir’ us lab-e-shirin pe na ho khaal

hota vatan-e-mor to hai tang shakar men

Leave a Comment