mohabbat daimi sukh hai
ki jis ko miit ki ghadiyan
kabhi kam kar nahin saktin
ye mausam ik dafa aae
to phir aa kar shahr jaae
hasin shadab si kaliyan
nigahon men saman jaaen
to phir ye mar nahin saktin
khayalon ki ravani men
ki jaise bahte paani men
kanval khil jaaen khvabon ke
to fitrat muskurati hai
ishara kar ke taron se
chhalakte absharon se
madhur sargoshiyan kar ke hamen rasta dikhati hai
ye rasta kis qadar hairan-kun manzar dikhata hai
usi raste pe insan khud ko pahli baar paata hai
mohabbat ko saza kahne se pahle soch kar rakhna
ki jo us se bichhad jaae
use manzil nahin milti
bikhar jaaen jo ban kar khaak phir mahfil nahin milti
mohabbat daimi sukh hai
Leave a Reply