shu.ur-e-nau-umr huun na mujh ko mata-e-ranj-o-malal dena
ki mujh ko aata nahin ghamon ko ḳhushi ke sanchon main Dhaal dena
hudud men apni rah ke shayad bacha sakun main vajud apna
main ek qatra huun mujh ko dariya ke raste par na Daal dena
agar ḳhala men pahunch gaya to palaT ke vapas na aa sakunga
tum apni hadd-e-kashish se uncha na mujh ko yaaro uchhal dena
vo suratan aadmi hai lekin mizaj se mar-e-astin hai
agar use astin men rakhna to zahr pahle nikal dena
na jaane khiḌki se jhankti ye kiran kise rasta dikha de
tum apne kamre ki khiḌkiyon par dabiz parde na Daal dena
sukut-e-shab toḌne ki ḳhatir bhi koi hangama saath rakhna
na shaam hote hi har tamanna ko qaid-ḳhane main Daal dena
ye ham ne maana ki tum men suraj ki si tapish hai magar ye sun lo
ki ham samundar hain aur asan nahin samundar ubaal dena
Leave a Reply