naam rakkha hai fusun-gar ne suḳhan-saz mira
ghonTe deti hai gala ab miri avaz mira
rah gaya raaz kisi tarah agar raaz mira
be-niyazi bhi uTha.egi tiri naaz mira
aaj hai maut bhi vo ishq jo kal tak tha hayat
muḳhtalif kitna hai anjam se aghaz mira
be-piye mast hua pi ke main bahka na kabhi
vo thi saaqi ki karamat pa hai e.ajaz mira
navak-e-naz se uḌte hain nishane dil ke
aur parde men abhi hai qadar-andaz mira
dhaḌkanen ab bhi hain vaisi hi shikasta dil ki
be-sada ho na saka TuuT ke bhi saaz mira
uzr be-bal-o-pari tha jo qafas toḌ chuka
dekh ke rah ga.i munh hasrat-e-parvaz mira
roz ik taaza bala aati hai dil ke hathon
‘jurm’ amada hai dam lene pe dam-saz mira
Leave a Reply