aisa hai ki sab khvab musalsal nahin hote
jo aaj to hote hain magar kal nahin hote
andar ki fazaon ke karishme bhi ajab hain
menh tuut ke barse bhi to badal nahin hote
kuchh mushkilen aisi hain ki asan nahin hotin
kuchh aise muamme hain kabhi hal nahin hote
shaistagi-e-gham ke sabab ankhon ke sahra
namnak to ho jaate hain jal-thal nahin hote
kaise hi talatum hon magar qulzum-e-jan men
kuchh yad-jazire hain ki ojhal nahin hote
ushshaq ke manind kai ahl-e-havas bhi
pagal to nazar aate hain pagal nahin hote
sab khvahishen puuri hon ‘faraz’ aisa nahin hai
jaise kai ashar mukammal nahin hote
Leave a Reply