Sajid Hameed
ruuh ko pahle ḳhaksar kiya
phir badan main ne taar taar kiya
dard ko shola-e-ḳhumar kiya
shisha-e-gham ko sharmsar kiya
ungliyan uThte uThte girne lagin
ham ne jab asman paar kiya
main nihatta tha kaise bach paata
aur pichhe se us ne vaar kiya
ra.egan ho rahi thi tanha.i
teri yadon ka karobar kiya
jab nazar men girah paḌi dekhi
shab ne ḳhvabon ko ab-dar kiya
dil ke sajde lahu-luhan hue
kin duaon ne beḌa paar kiya
log kitne bichhaḌ ga.e ‘sajid’
ḳhud ko ham ne bhi be-hisar kiya
Leave a Reply