ham ne kisi ko ahd-e-vafa se riha kiya
apni ragon se jaise lahu ko juda kiya
us ke shikasta vaar ka bhi rakh liya bharam
ye qarz ham ne zakhm ki surat ada kiya
is men hamari apni khudi ka saval tha
ehsan nahin kiya hai jo vaada vafa kiya
jis samt ki hava hai usi samt chal paden
jab kuchh na ho saka to yahi faisla kiya
ahd-e-musafarat se vo mansukh ho chuki
jis rahguzar se tum ne mujhe ashna kiya
apni shikastagi pe vo nadim nahin hua
meri barahna-pai ka jis ne gila kiya
Leave a Reply