ab aa gaya hai jahan men to muskurata ja
chaman ke phuul dilon ke kanval khilata ja
adam hayat se pahle adam hayat ke baad
ye ek pal hai use javedan banata ja
bhatak rahi hai andhere men zindagi ki barat
koi charagh sar-e-rahguzar jalata ja
guzar chaman se misal-e-nasim-e-subh-e-bahar
gulon ko chhed ke kanton ko gudgudata ja
rah-e-daraz hai aur duur shauq ki manzil
garan hai marhala-e-umr giit gaata ja
bala se bazm men gar zauq-e-naghmagi kam hai
nava-e-talkh ko kuchh talkh-tar banata ja
jo ho sake to badal zindagi ko khud varna
nazhad-e-nau ko tariq-e-junun sikhata ja
dikha ke jalva-e-farda bana de divana
nae zamane ke rukh se naqab uthata ja
bahut dinon se dil-o-jan ki mahfilen hain udaas
koi tarana koi dastan sunata ja
Leave a Reply