Ashu Mishra
tumhare saath ye qissa kabhi kabhar ka hai
magar ye hijr mire saath bar-bar ka hai
hamare darmiyan ik shak ki film hai jis men
kahin kahin pe koi scene e’tibar ka hai
ye teri ham pe inayat hai ya chaman men kisi
ḳhizan-nasib ke hisse men sukh bahar ka hai
agar tu ḳhud ko khula chhoḌta hai jan-e-bahar
to tujh pe haq tire pahle umid-var ka hai
ye tera jism hai ya rahguzar-e-gul hai koi
qaba ka band hai ya peḌ regzar ka hai
main dil ke baare men itna hi jaan paaya huun
kabhi ye ek ka hota tha ab hazar ka hai
Leave a Reply