dhuup utha li main ne apne hisse ki
bhar li thali main ne apne hisse ki
us ki ankhon men khvabon ka jangal tha
niind chura li main ne apne hisse ki
jab bhi andhera hote dekha basti men
aag jala li main ne apne hisse ki
us ke hisse ka jivan to daan kiya
umr bacha li main ne apne hisse ki
masnad par jhagda tha lo ye masnad bhi
kar di khali main ne apne hisse ki
bhiid bahut thi bane-banae raston men
raah nikali main ne apne hisse ki
kar rakkhi hai aane vaale dinon ke naam
rut hariyali main ne apne hisse ki
Leave a Reply