jab shab-e-furqat ki tariki se ghabrata huun main
teri yadon se dil-e-muztar ko bahlata huun main
jab kisi zohra-jabin ko samne paata huun main
hosh ki har dastaras se duur ho jaata huun main
arzuen laakh hoti hain mire dil men magar
samne aate ho jab tum kuchh na kah paata huun main
sust-rau hoti hai jab rah-e-talab men justuju
sho.ala-e-azm-o-amal se dil ko garmata huun main
chhoḌ de us be-muravvat ki tamanna chhoḌ de
rat-din ye baat apne dil ko samjhata huun main
jab kabhi guzre dinon ki yaad aati hai mujhe
dil taḌapta hai mira aur ashk barsata huun main
saghar-e-sahba se ‘nayyar’ kya gharaz mujh ko bhala
pi ke un ki mai-fishan nazron se lahrata huun main
Leave a Reply