Raat

Ismail Merathi

gaya din hui shaam aai hai raat

khuda ne ajab shai banai hai raat

na ho raat to din ki pahchan kya

uthae maza din ka insan kya

hui raat khilqat chhuti kaam se

khamoshi si chhai sar-e-sham se

lage hone ab hot bazar band

zamane ke sab kaar behvar band

musafir ne din bhar kiya hai safar

sar-e-sham manzil pe kholi kamar

darakhton ke patte bhi chup ho gae

hava tham gai ped bhi so gae

andhera ujale pe ghalib hua

har ik shakhs rahat ka talib hua

hue raushan abadiyon men charagh

hua sab ko mehnat se hasil faragh

kisan ab chala khet ko chhod kar

ki ghar men kare chain se shab basar

gharib aadmi jo ki mazdur hain

mashaqqat se jin ke badan chuur hain

vo din bhar ki mehnat ke maare hue

vo mande thake aur haare hue

nihayat khushi se gae apne ghar

hue baal bachche bhi khush dekh kar

gae bhuul sab kam-dhandhe ka gham

savere ko utthenge ab taza-dam

kahan chain ye badshah ko nasib

ki jis be-ghami se hain sote gharib