Nasir Zaidi
ham ajab silsila-e-sair-o-safar rakhte hain
har qadam ek na.i rahguzar rakhte hain
zad pe tufan ke kaghaz ka nagar rakhte hain
laakh sailab-e-havadis ho magar rakhte hain
is ke ba-vasf ki har samt andhera hai muhit
ham hain vo log jo ummid-e-sahar rakhte hain
teri baten tiri yaden tire rangin ḳhutut
apne hamrah yahi zad-e-safar rakhte hain
ham ḳhatavar-e-zamana hain farishte to nahin
hain ziyan-kar ki ausaf-e-bashar rakhte hain
dil ke juzdan men ik naam saja hai ‘nasir’
ham kisi haal men hon us ki ḳhabar rakhte hain
Leave a Reply