rangon se ThanDe paani ke chashme bana diye
kaghaz pe saya-dar shajar bhi laga diye
la.unga ab kahan se nazare ki taab main
us ne to meri aankh se parde haTa diye
bagh-e-huruf-o-gulshan-e-ma.ani men dekhna
kis ne ye ḳhamushi ke na.e gul khila diye
chhoTe se abr paare ne aa ke sar-e-falak
ahl-e-nazar ko din Dhale paigham kya diye
bas ham to ek chhoTi si zid pe aḌe rahe
dastar ko bachane men sar hi kaTa diye
ankhon men rah ga.e hain faqat aas ke sarab
dariya vo yaas ke the jo un men baha diye
din ko safar kuchh aur bhi asan ho gaya
raton ko sabz ḳhvab ye kis ne dikha diye
tartib se liye hain tumhare tamam naam
ik aur hi falak pe sitare saja diye
tufan ka ruup dhaar liya tez saans ne
itna ki ḳhvab-gah ke parde hila diye
Leave a Reply