dast-e-junun men daman-e-gul ko laane ki tadbir karen
narm hava ke jhonko aao mausam ko zanjir karen
mausam-e-abr-o-bad se pochhen lazzat-e-sozan ka mafhum
mauja-e-ḳhun se daman-e-gul par harf-e-junun tahrir karen
amad-e-gul ka virani bhi dekh rahi hai kya kya ḳhvab
virani ke ḳhvab ko aao vahshat se ta.abir karen
raat ke jaage sub.h ki halki narm hava men so.e hain
dekhen kab tak niind ke maate uThne men taḳhir karen
tanha.i men kahish-e-jan ke hathon kis aram se hain
kaise apne naaz uTha.en kya apni tahqir karen
betabi to ḳhair rahegi betabi ki baat nahin
marna itna sahl nahin hai jiine ki tadbir karen
ghuum rahe hain dasht-e-junun men un ke kya kya ruup ‘jamil’
kis ko dekhen kis ko chhoḌen kis ko ja ke asiir karen
Leave a Reply