Mere Rashk-E-Qamar Tu Ne Pahli Nazar Jab Nazar Se Milai Maza Aa Gaya

Poet

mere rashk-e-qamar tu ne pahli nazar jab nazar se mila.i maza aa gaya

barq si gir ga.i kaam hi kar ga.i aag aisi laga.i maza aa gaya

jaam men ghol kar husn ki mastiyan chandni muskura.i maza aa gaya

chand ke saa.e men ai mire saqiya tu ne aisi pila.i maza aa gaya

nashsha shishe men angḌa.i lene laga bazm-e-rindan men saghar khanakne laga

mai-kade pe barasne lagin mastiyan jab ghaTa ghir ke aa.i maza aa gaya

be-hijabana vo samne aa ga.e aur javani javani se Takra ga.i

aankh un ki laḌi yuun miri aankh se dekh kar ye laḌa.i maza aa gaya

aankh men thi haya har mulaqat par surḳh aariz hue vasl ki baat par

us ne sharma ke mere savalat pe aise gardan jhuka.i maza aa gaya

shaiḳh-sahab ka iman bik hi gaya dekh kar husn-e-saqi pighal hi gaya

aaj se pahle ye kitne maghrur the luT ga.i parsa.i maza aa gaya

ai ‘fana’ shukr hai aaj bad-e-fana us ne rakh li mire pyaar ki aabru

apne hathon se us ne miri qabr pe chadar-e-gul chaḌha.i maza aa gaya