Lalach Se Aur Jaur-O-Jafa Se Nahin Bani

Fani Jodhpuri

lalach se aur jaur-o-jafa se nahin bani

apni zamin vaale ḳhuda se nahin bani

ḳhushiyon ke saath rah na sake ek pal kabhi

ya.ani charaghiyon ki hava se nahin bani

sunne ki had talak use ik baar kya suna

kanon ki phir kisi bhi sada se nahin bani

apni ana ki ret pe apne usuul pe

paala vo dard jis ki dava se nahin bani

ham ne isi zamin pe ‘fani’ khila.e phuul

muddat se jis zamin ki ghaTa se nahin bani