Ab Apni Ruh Ke Chhaalon Ka Kuchh Hisab Karun

ab apni ruuh ke chhalon ka kuchh hisab karun

main chahta tha charaghon ko aftab karun

mujhe buton se ijazat agar kabhi mil jaae

to shahar-bhar ke khudaon ko be-naqab karun

us aadmi ko bas ik dhun savar rahti hai

bahut hasin hai duniya ise kharab karun

hai mere charon taraf bhiid gunge bahron ki

kise khatib bana.un kise khitab karun

main karvaton ke nae zaiqe likhun shab-bhar

ye ishq hai to kahan zindagi azaab karun

ye zindagi jo mujhe qarz-dar karti rahi

kahin akele men mil jaae to hisab karun

Leave a Comment