Poet
pahchan zindagi ki samajh kar main chup raha
apne hi phenkte rahe patthar main chup raha
lamhe andhere dasht men piite rahe mujhe
mujh men tha raushni ka samundar main chup raha
mere lahu ke rang ka aisa asar hua
munsif se bolta raha ḳhanjar main chup raha
bojhal udaas raat thi ḳhamosh thi hava
phulon ki aag men jala bistar main chup raha
‘asrar’ kyuun kisi se main karta shikayaten
vo aḳhiri tha raah ka patthar main chup raha
Leave a Reply