Zamin Ke Hath Yun Apna Shikanja Kas Rahe The

Manish Shukla

zamin ke haath yuun apna shikanja kas rahe the

sutun saare mahal ke rafta rafta dhans rahe the

umiden lamha lamha ghaT ke marti ja rahi thiin

ajab aaseb se aa kar dilon men bas rahe the

shajar pe zahr ne ab rang dikhlaya hai apna

ruton ke saanp yuun to muddaton se Das rahe the

mira suraj miri ankhon ke aage bujh raha tha

mire saa.e miri be-chargi pe hans rahe the

paḌe hain vaqt ki choTon se ab mismar ho kar

vahi patthar jo apne daur men paras rahe the

ujaḌa kis tarah andhi ne bedardi se dekho

nagar ḳhvabon ke kitni hasraton se bas rahe the

uḌanon ne kiya tha is qadar mayus un ko

thake-hare parinde jaal men ḳhud phans rahe the