Jahangeer Nayab
ik justuju sada hi se zehn-e-bashar men hai
jab se mili zamin musalsal safar men hai
har-chand mere saath udasi safar men hai
raushan charagh-e-shauq magar chashm-e-tar men hai
mallah kah raha hai ki sahil hai bas qarib
lekin mujhe pata hai ki kashti bhanvar men hai
tum se kabhi jo bol na paaya main ek baat
ban kar ḳhalish vo aaj bhi mere jigar men hai
barbadiyon ki zad pe faqat shaḳh-e-gul nahin
gulshan tamam nargha-e-barq-o-sharar men hai
jab se main un ke halqa-e-bai.at men aa gaya
‘nayab’ ek raushni fikr-o-nazar men hai
Leave a Reply