ab ye kaifiyyat-e-dil hai ki chhupa.e na bane
aur jo vo puchhen ki kya hai to bata.e na bane
tum ko azurdagi-e-dil ka maza kya ma.alum
kaash tum se bhi koi kaam bana.e na bane
tu ne kyuun un ko gham-e-zist diya hai yarab
jin se ik ranj-e-mohabbat bhi uTha.e na bane
haa.e kya pas-e-mohabbat hai ki tanha.i men bhi
ashk ankhon men rahe aur baha.e na bane
ham-nashin puchh na is bazm ki rasmen ki jahan
mujh se vahshi ko bhi bin hosh men aa.e na bane
vaqt ki charagari yuun to musallam hai magar
zaḳhm bhi vo hai ki ta-umr daba.e na bane
ye bhi ik rasm-e-tamasha hai vahan ai ‘ali’
dekhte rahiye magar aankh uTha.e na bane
Leave a Reply