humaira-rahat

Hawa Ke Sath Ye Kaisa Moamla Hua Hai

hava ke saath ye kaisa moamla hua hai

bujha chuki thi jise vo diya jala hua hai

huzur aap koi faisla karen to sahi

hain sar jhuke hue darbar bhi laga hua hai

khade hain samne kab se magar nahin padhte

vo ek lafz jo divar par likha hua hai

hai kis ka aks jo dekha hai aine se alag

ye kaisa naqsh hai jo ruuh par bana hua hai

ye kis ka khvab hai tabir ke taaqub men

ye kaisa ashk hai jo khaak men mila hua hai

ye kis ki yaad ki barish men bhigta hai badan

ye kaisa phuul sar-e-shakh-e-jan khila hua hai

sitara tutte dekha to Dar gai ‘rahat’

khabar na thi yahi taqdir men likha hua hai

More Poems

Leave a Comment