dost ban kar doston ki bevafa.i dekhiye
kaj-ada.i dekhiye be-e’tina.i dekhiye
rahguzar-e-shauq men ham rakh to baiThe hain qadam
jaane kab manzil pe ho apni rasa.i dekhiye
kis bala ka sehr tha un ki nigah-e-naz men
dil ne ḳhud baḌh kar nazar ki choT khaa.i dekhiye
mere sajdon ke muqaddar men vo sang-e-dar na tha
meri peshani pe dagh-e-na-rasa.i dekhiye
ishq men nam-o-nasab ka kis ko rahta hai ḳhayal
hai nasib-e-ishq men to jag-hansa.i dekhiye
zindagi men ham ne dekhin uljhanen hi uljhanen
uljhanon se kis tarah hogi riha.i dekhiye
zindagi ka ek pal bhi chain se guzra nahin
jab se ki taslim dil ki rahnuma.i dekhiye
aap ne naraz ho kar jab se ankhen pher liin
meri dushman ban ga.i saari ḳhuda.i dekhiye
jal rahi huun kab se ai shahnaz apni aag men
ab sarir-e-ḳhama ki sho.ala-nava.i dekhiye
Leave a Reply