koi to dil ki nigahon se dekhta jaae
hamari ruuh ke kuchh gham sametta jaae
tumhare milne ki har aas aaj tuut gai
tumhin batao ki ab kis tarah jiya jaae
zara to sochiye us dil ka haal kya hoga
talash-e-gul men jo patthar ki chot kha jaae
saja ke tum ko gulon se uthae hain patthar
zamana kitna sitamgar hai kya kiya jaae
karenge kaise haqiqat ka samna ham log
hamen to khvab hi koi dikha diya jaae
kisi tarah to andhere ghamon ke chhat jaaen
mira bujha hua dil hi koi jala jaae
rah-e-hayat men kante bichhen ki phuul khilen
ye shart hai tiri janib vo rasta jaae
Leave a Reply