manzilon ke fasle divar-o-dar men rah gae
kya safar tha mere saare ḳhvab ghar men rah gae
ab koi tasvir bhi apni jagah qaaem nahin
ab hava ke rang hi meri nazar men rah gae
jitne manzar the mire ham-rah ghar tak aae hain
aur pas-e-manzar savad-e-rah-guzar men rah gae
apne qadmon ke nishan bhi band kamron men rahe
taqchon par bhi diye ḳhali nagar men rah gae
kar gai hai naam se ghafil hamen apni shanaḳht
sirf avazon ke saae hi ḳhabar men rah gae
na-ḳhudaon ne palaT kar jaane kyuun dekha nahin
kashtiyon ke to kai taḳhte bhanvar men rah gae
kaisi kaisi ahaTen alfaz ka paikar banin
kaise kaise aks meri chashm-e-tar men rah gae
haath ki saari lakiren paanv ke talvon men thiin
aur mere ham-safar gard-e-safar men rah gae
kya hujum-e-rang ‘aḳhtar’ kya farogh-e-bu-e-gul
mausamon ke zaiqe buḌhe shajar men rah gae
Leave a Reply