Hafeez Banarasi
jo pardon men ḳhud ko chhupa.e hue hain
qayamat vahi to uTha.e hue hain
tiri anjuman men jo aa.e hue hain
gham-e-do-jahan ko bhula.e hue hain
koi shaam ke vaqt aa.ega lekin
sahar se ham ankhen bichha.e hue hain
jahan bijliyan ḳhud amaan DhunDhti hain
vahan ham nasheman bana.e hue hain
ghazal aabru hai to urdu zaban ki
tiri aabru ham bacha.e hue hain
ye ash.ar yuun hi nahin dard-agin
‘hafiz’ aap bhi choT khaa.e hue hain
Leave a Reply