Najma Shaheen Khosa
phir misr ke bazar men nilam hua kyuun
ai ishq bata tera ye anjam hua kyuun
ham ba.is-e-rahat jise samjhe the vo lamha
ab apne liye ba.is-e-alam hua kyuun
ai ishq falak par tujhe likha jo ḳhuda ne
phir tera muqaddar bhala ib.ham hua kyuun
ai ishq tira naam hai jab sach ki alamat
ai ishq tu rusva yuun sar-e-am hua kyuun
jab ek hi sajde men tira bhed chhupa hai
phir sang-e-malamat hi tira daam hua kyuun
ai aankh tu be-ḳhvab hai ḳhvabon ki talab men
ye hijr hi aḳhir tira in.aam hua kyuun
chehre pe tire kis liye hairat hai abhi tak
ye itni vazahat pe bhi ib.ham hua kyuun
is dil ko hai mahbub vahi dard ka naghma
is dil men ta.ajjub hai ye kohram hua kyuun
jo teri mohabbat ko samajh hi nahin paaya
‘shahin’ ye dil us ke bhala naam hua kyuun
Leave a Reply