gham-nasibon ko kisi ne to pukara hoga
is bhari bazm men koi to hamara hoga
aaj kis yaad se chamki tiri chashm-e-pur-nam
jaane ye kis ke muqaddar ka sitara hoga
jaane ab husn luTa.ega kahan daulat-e-dard
jaane ab kis ko gham-e-ishq ka yaara hoga
tire chhupne se chhupengi na hamari yaden
tu jahan hoga vahin zikr hamara hoga
yuun juda.i to gavara thi ye ma.alum na tha
tujh se yuun mil ke bichhaḌna bhi gavara hoga
chhoḌ kar aa.e the jab shahr-e-tamanna ham log
muddaton rah-guzaron ne pukara hoga
ek tufan men qarib aa ga.i apni manzil
ham samajhte the bahut duur kinara hoga
muskurata hai to ik aah nikal jaati hai
ye ‘tabassum’ bhi koi dard ka maara hoga
Leave a Reply